O NGIDIM

---

Waali Laasuk Fay

---

O NGIDIM

a Maam-Kumba, fa Anita Fostiin Sali Fa Ndeela Miranda Fay, lingeer es tadik ke

---

NDOKAND NE

Xa ƥees, safe lene mexe gidmitan maam nuun Waatew Debo, fa Laasuuk Kumba Yaay, fañ o weec a Lewopool Sedar Seeŋoor fee gartuuna, xeɗaa Roog fo Pangool a mbi o laaw den a fiɗatin a ndeer in, fianan seereer ke fop, soo nen o fonq um bugin o diƈ na caf Pangool ke Sinig.

Weeciim paap es fo yaay es fo tokoor es, neatiim maasir es, jigeen es, fog faap es fo fog yaay es fo jigeen es, Maaniin Xaaniin, Cuugayiin, Seynabuyiin, Njogosiin, Maymunayiin; Xadiyiin, Woliyiin. Oxuu gon um na nuun a bindaandeena, fat a waasan a a in, a fañ o foog ee kaa weecel mbaat boog, a neew neew, ten fa xoox um ta retit a kid yiif, a and ee o maag mbaat o ndeb a kañange, wo oo teen fogo.

Mexe gidmitan a Usmaan Fay fee ndeɓ es, ten oxe liiratinna ke bind’uuma, a ɓaataam a kid fo yiif, doon teen we ngenna Ɗuuɗam fop fo caate ke ndeeruuna, fokat we Mbey fa Sinig. Ke nu ngeennoogaxama, laamtaxam kaa jofna na Seeŋoor fo ke ta bindna a ata paax mayu kaa yiif nuun a gomkeerna sax. Kaltaa weene, I mbar o tagas a salma_koor ake ngeenwannna cosaan seereer, ta ref Amat Fay, o maag on mogeena andit “Kaboy” saate faa, fa Waali-Koly Fay Sam Roog a yirmin, fa Suleymaan Fay, den fop da ndef porofesoor Iniwersite Siix Anta ne Ndakaaru, bo na Mbañik Njaayyyin, Baabakar Juuf Tokoor es Kumba Deb, ndefna Mal Ndef Leng. Njokoo njal ! Fokataam teen xa teb es Abdulaay Jimboor, Waag o Ngende Maan, Fa Waambisaan; Waambisaan, um bugong o lay ee jook-a-njal Dugu-Dugu Waagaan, yaam o geenwan’u in a Baaba sa sop I loof no sep adna.

Waagiin o weecit a maam Ñilaan Ɓaaxum, fo Raaɓoor we ndefna ndef Gare-kare we ƭeen in, fo Jaxaanoora we ƭeen Jogoy Seeŋoor. Yaay fuu andoona yee kaa o ƥeem a foygu ndeer o yeng o njeek nen o Taaɓoor o maak oxeeke, a waaƭaa oxaa ɓopuuna too ya um waagiran o nan yaam o wuuq ole reef na lak doxandeem, ta dekanin a in nen o fuudu, in xa ƥiy axeene, a jaɓan a in a baasnax ale andoona yee o ɗelem xooɗoodkee baa firit naqad fee a qeeñ in a mbofna. Fat a woorin ee in we ngeenwa no ga Seeŋoor ye ta layna a Maam Ñilaan Ɓaaxum ee: “Ba foog muk ee ñaal ke faak kaam sañit a den na yiif es nen nqeñ fa ƭooqlandaan. Kaam nanang too nankiraamo, nen yaay faa diidna baa weecit o fuur ngiƈ ndibu o ƥeem. Koo andi yee yiif leeke na ɓaalaa fop, nduɓaaɓ a waltan, weectee cosaan paap es, weectee cosaan paap den, weectee cosaan paapaat den. Yaa ! na ndok aleeke Late fo Gerek a moofna, baa xeeñ es le na yedaa mo-ong. Sam Pangool a ndamtaam boo cosaan es maaskee yaam yar toxandeem fo nduɓaaɓ ”. Ten tax fat I ngoorgoorlu njangik a seereer ne Simoŋ Seen a laytuuna.

Mexe gidmaa fop we ndamtaxama, a ƥaataam yiif. Saɗiim o weec we ngenna Ganjool yaam no nqel den eetum o jangnit a seereer. A yiif es a ngoma a Jaabeel Jeŋ, fa Baabakar Juuf fa Bukar Juuf a Ngoyeer, fo we da mbogit’ina biro; gidmaa Rajo Ndef Leng FM fo we nqoytoogna maaga, gidmaa a Laatir Fay fo giigim we a kim den a yoonoogaxama na supit ale, a sanqaa o laaw es fo yiif es. Yaa Yaande Kodu Seen, koo daɗi, malaaka paax a nqetwong. Yaasam Roog-o-Yaa-in-Seen a rabid a nuun, nuun fop, no ƈulfaand ne taxna safe leeke waag o jeg.