FA NQON UM FO KAA KALTAA

Ye ta saayna, a jega surnaalisti faa laamtaxam ndeer Seeŋoor fo fa nqon. Den na laamtaa kuu yoqeerna, ndaa keene na gartaa o and; neene waru refit.

I mbooga yee o lend saɗee fa nqon, ndaa koy nãkin o saɗ fo xalaman cay mbogree. Ke kiin a warna fi, mbaa ke ta waagna fi refu and ee fa nqon oxe garaa, ta taxkaa o jagandoox ndeer of fa Roog, jagandoox fo kaltaa semb of, jagandoox fo kaltaa semb of a war o reef no jagandoox ndeer of fo wiin we.

Ñoowaa fi nen fa nqon jegee, fo ñoowaa, fa nqon soom ee xot no yiif ñaal fo yeng mbodu. No ga in, dara teen xotee a ƭat. I nga-a na Seeŋoor o ga ole andoona yee ten waru, ta ref rek ke I layna xa toor : and ee fa nqon waagaand o daɗ, and ee o kiin oo kiin kaa jeg ke Roog a sepanuuna na adna, and ee o sep oleene, fo nuu ta wagna ref, fo fo kuu ta waagna ref, ndeer o kiin fo kiin a foga teen. Na cangtax um ale ta ne’na Siiknoor fa Jaaniiw, keeke layu in :

Koo dakwaan o bifil o xoo
A qoor ee mes, um ɓunaa o ñoow no duutung a ngas jaaniiw
O waaswaniidaam nen o ɠaxal o baftu na naaq !
Woy ! paambaañ ke we ndaaɓaa xa qep es,
misiirang a tax um faɗu lanq ƥutu,
sendaa bo no qol pangdir too a caf es a ndikel.

Oxaa na ɓunaa o ñoow no duutung a ngas jaaniiw, refu rek oxaa refna ndeer xon fo ñoow, ta nand nen kaa jir’u, fa nqon a waaswaniidin nen o ɠaxal o baftu na naaq. O soxlau o ñoow, a bugin, na ɓunan.

Ne I laytuuna, fa nqon felee o leng. Sedar a faɗwa lanq ƥutu, a sendaa bo no qol pangdir too a caf um a ndikel. A anda yee waagee daɗ. A lalta yee ke ta foyguwaa fop jariran. Ne ta gaitna tige guutatiree fa Wuusafulel fee Saŋ Pool Sartar a bindna. No ga no xaaga, o kiin kaa war o inu, a jeg fayda no ke ta jagnuna, yaam adna jegee xoox, o ñoow no kiin a moɠin o dey waar. Oxe na ñoowaa kaa nand fo xaa wuusafuleleena rek, a cungteel o jaf um ole ta dakkaa o feet olaa feet. Nuu ta saxitna yoo bes ta garanin, nen oxaa hate-eena too ɓekaand kaso yaam a waasel, a cungteel jaf lakas. Neene reftu no ñoow fo fa nqon.

Mbanuu I ndetna boo njir, fa nqon a waaga gar. I sutwangaa no jir laaga, fa nqon oxe mbaambir in bo ndiik, a cungaa. Ta ref nen o ndeɓandoong onqaa bugna rof baa eetatireel o ten. Ye ta fadiidna yoora ndof ne, rof lakas ee xusdit, a gar a soƥin, ta ref nen o bug rof a tax rof a warong. Moɠ o jaak we, bug o ñoow taxu o ñoow a daɗaa den mbaat ta ret baa war a den :

Wo fee merkaandeena muk, waldiid a caf a tadak,
Wetandwaam um god o joor gindreel o ñoow
Ne ndeɓandoong a eetatirteel rof
- Soo rof lakas ee xusdit a soƥin.

A soƥangaa yee neene yoo koy, a deya waar. Kupu kaaga, ke ta deyaandeena fit fop oo, fa nqon waaƭee njambaar, jariran. Oxuu saɗuuna o ƭof a refu, kaltaa kaaga fa nqon in refee fa nqon in, lakas we njegun. I andee fop ke na xewaa yaa ta naagna jasyaak, ndaa I nqonangaa, kaam ee o dal in a xesangaa wondu, lakas we andu yee I nqona, cer in in fa qoox in I andee teen tig :

Jaaniiw ! Waagaa tax o koor a daaq baa daɗ a salma-koor alaa na widaa mbind a carind ɓetaa ƭak !

Ndigil a layu. Oxuu refna na in na ɠufaa a widaa, a retaa no togtoor ke fo fan we, a retaa farmasi yaam ñiiñ ɗom, sibiru, xoox-ɗom, mbaat o fud-o-ɗom. Ndaa koy ke Seeŋoor a moɠna diidaa refangee fa nqon fa xoox, ndaa fa nqon a soƥin too ɠutee ke ta sumbna. Keene a jega njektir maak :

Ndaa koy boo ƈiid a fadiidna o roxanaa adna cer ƭom fa sumaan,
koo ɗeeti yee na doole fo yaakaar fodum.
Ndi boog ye bufaxamoona kaa gomiro doole es,
ga ne sereƥoortuuma no ñoow ?

A ɓaata teen ee :

Mbaa ree sax o yeng jaaniiw fadiidu, too I asooree
Um wondukaa, loolaa na semb es nen o nqeq onqaa na diilwaa ?
A soƥangaa yee neen oo, xan o yung a singaam njoor xa kooniit
bo yaa o soƥiidkaxam, mbeet muuceek of a leel a tagid es.

Seeŋoor nen o tew a ga’taa fa nqon. Kaa ga-an nen o kulook no yeng a ƥoxot. Xeƈa ke fa nqon a yoonitna a bondax ndaxaan gartun :

Andaam ee xan Ƈiid a ñambaasu na Sarandam,
tuñ lanq ee sur na xa ñis es, a mbayaam nen fo rof,
Lanq ke ƭaaswanaam, ƭeen um a ngeenu ».

A anda xil ee xan o kulook oxeene naag dareet na carind, Roog a fudnanin o ten. Ndaa koy boo bes faaga fadiidaa, a jega ke ta yegnitna, nen saltiki :

Andaam ee xam wat o joor nen o Tuleer,
lalit mukit Afrik nen oxaa na saxaa nitaal,
and ee o tew oxe um nanaa a kim um no mbuyukuun
xan a nomtuwiid a jopir daaƭ le looɠaa,
o tew oxe na mukit fa ƥaal fee saqna xoox muumeen,
o tew oxeene naagna fuy too yaƥatiim yaƥatee,
a jopir njoloor o mbuc kam o Gus-Tugal ».

Ndigil, a jega o tew oxaa xalatook’uuna, a soƥin Tugal, o tew oxaa saqna xoox njogoy, I mbar’u lay ee doole njogoy. No ndeƥandoong a nqet’u, Roog a fokat a den, da ñoow ke da ñoowna, a njootnir a kon, o tew oxe nomtuwiid no jul o ñoow um, ndax kaa I mbar o lay ee no mudand njeeƈ o ñoow Seeŋoor. O tew oxe kaa fiyahinin ta ref ƭik-a-ƭik, yaam fa nqon um fee ta ga’na nen o kulook oo a foga no ke ta neaa. Ye ta bifluuna, a xaɠin, kaa fi nen o tew oxaa fuuxna, a hus, Sedar a and ee xan a gat; xan a nomtuwiid. Yaa bes feene garkaa, neeke soƥitkan :

Xa qoor o ɓemb-roog o ñamaak owe ƭeetwaa no cat o raatam of
A Naaƥ ale fi nen a soɓoñ no kooñ fitna mukit of.
Ɠeelaam yaam xeeñ es a riñiid nen o maag Niseer ndeer ndiig.
Xam falalu, lay we ngenna no cas ke yee – Nanyo!
Falalu, lay we mbugirna a ngukraa na tambando yee – Nanyo!
Soo naag daket inu ret letnoox, jam a ɗugwaam,
Um wondnel ndaxaan kam jam o niɓaan lanq ke Joong
Bo yaa Malaaka Mbuyukuun a nomitkaxam a qoolaand of
Um yokoor ndigil ñexetu!